Tanzania yapokea msaada wa trillion moja kutoka Uingereza.

Rais john Magufuli na mkurugenzi wa shirika la maendeleo la kimataifa (DFID) nchini,Elizabeth Arthy ,wengine ni waziri wa mambo ya nje wa uingeleza anayeshugulikia masuala ya afrika picha na ikulu.

UINGEREZA imetoa msaada wa Dola za Marekani milioni 450 (sawa na takribani Sh trilioni moja) kwa ajili ya kusaidia miradi mbalimbali ya maendeleo nchini.

Waziri wa Nchi anayeshughulikia Maendeleo ya Kimataifa na Masuala ya Afrika katika Ofisi ya Mambo ya Nje na Jumuiya ya Madola ya Uingereza, Rory Stewart aliyatangaza hayo jana baada ya kukutana na Rais John Magufuli, Ikulu jijini Dar es Dar es Salaam.

Kwa mujibu wa taarifa ya Ikulu, Stewart alisema fedha hizo zitaelekezwa katika maeneo mbalimbali ya maendeleo hususani katika kuinua ubora wa elimu na kuongeza idadi ya watoto wanaopata elimu, kuimarisha miundombinu hasa barabara na bandari, kuinua kilimo cha kibiashara na viwanda kama vile viwanda vya pamba na nyama.

Taarifa hiyo ilieleza kuwa Stewart alimpongeza Dk Magufuli kwa kazi kubwa iliyofanywa na serikali katika mapambano dhidi ya rushwa na hatua zilizochukuliwa, kuimarisha elimu kwa kuwapa nafasi Watanzania wengi zaidi kupata elimu.

“Nimetembelea shule moja hapa Dar es Salaam jana, na nimejionea jinsi sera ya kutoa elimu bila malipo ilivyoleta mabadiliko makubwa katika kuongeza idadi ya wanafunzi, nimezungukia shule, nimezungumza na wazazi na nimezungumza na walimu, idadi ya wanafunzi imeongezeka karibu mara mbili, hili ni jambo kubwa sana kutokea kwa muda mfupi na linaleta mabadiliko makubwa katika maisha ya watu, elimu ni kila kitu,” alieleza Stewart.

Alibainisha kuwa wananchi wa Uingereza wanaipenda Tanzania na serikali yao itaendelea kushirikiana na Tanzania katika masuala mbalimbali ya uhusiano na ushirikiano. Alisema kwamba ana matumaini kuwa msaada ilioutoa, utasaidia kuinua uchumi na maisha ya Watanzania.

Kwa upande wake, Dk Magufuli alimshukuru Stewart kwa kuja nchini na amemuomba ampelekee shukrani zake kwa Malkia Elizabeth II na Waziri Mkuu wa Uingereza, Theresa May kwa msaada mkubwa uliotolewa kwa lengo na kuunga mkono juhudi za maendeleo zinazofanywa na Serikali ya Awamu ya Tano.

Rais Magufuli alisema Uingereza ndio nchi inayoongoza kwa uwekezaji nchini na alimhakikishia Stewart kuwa Tanzania inatambua mchango mkubwa wa nchini hiyo katika maendeleo ya Tanzania.

Aidha, Rais Magufuli amewataka Watanzania waelewe kuwa hatua zinazochukuliwa na serikali dhidi ya rushwa zina manufaa makubwa kwa nchi, na alisema serikali itahakikisha fedha za msaada zilizotolewa na Uingereza zinasimamiwa vizuri.

“Na ndiyo maana tuwaomba Watanzania waendelee kutuunga mkono katika mapambano dhidi ya rushwa, rushwa ni ugonjwa mbaya sana, tukijisafisha katika rushwa nchi yetu itakwenda mbele, katika juhudi tunazofanya wapo wengine wanalalamika lalamika lakini matokeo yake ni makubwa na ndiyo maana ndugu zetu Waingereza wanaona.

“Pia nitoe mwito kwa Watanzania kulipa kodi, hatuwezi siku zote tukawa tunategemea kodi za kutoka kwa nchi marafiki kama Uingereza, ni lazima tujenge mazingira ya Watanzania kuamini kuwa kulipa kodi ni kitu muhimu katika maendeleo yao,” alisisitiza Rais Magufuli.

Mazungumzo hayo yalihudhuriwa na Balozi wa Uingereza nchini, Sarah Cooke, Waziri wa Mambo ya Nje na Ushirikiano wa Afrika Mashariki, Dk Augustine Mahiga, Waziri wa Fedha na Mipango, Dk Philip Mpango na Katibu Mkuu wa Wizara ya Fedha na Mipango, Doto James.

Uingereza ni moja ya nchi tano duniani zinazoongoza kwa uwekezaji nchini na katika biashara na sekta binafsi. Nyingine ni pamoja na China, Afrika Kusini na India. Pia, Uingereza ni moja ya wahisani wakubwa, wanaosaidia Mfuko Mkuu wa Bajeti wa Tanzania kila mwaka.

Katika mwaka wa fedha wa 2010/11, Uingereza ilitoa asilimia 29.4 ya bajeti na katika bajeti ya 2015/16, Uingereza ilipanga kutoa msaada wa zaidi ya Sh bilioni 622. Kiasi hicho kiliongezeka pia katika mwaka wa fedha 2016/17.

Mbali na Uingereza, wahisani wengine wakubwa wanaochangia bajeti ya Tanzania ni Benki ya Maendeleo ya Afrika (AfDB), Canada, Denmark, Umoja wa Ulaya (EU), Finland, Germany, Ireland, Japan, Norway, Sweden na Benki ya Dunia.

Hali kadhalika, kwa miaka mingi Serikali ya Uingereza imekuwa mstari wa mbele kusaidia mapambano dhidi ya rushwa na imejitahidi kujengea uwezo Taasisi ya Kuzuia na Kupambana na Rushwa (PCCB) na idara ya mahakama.