Serikali ya mtaa wa Kampuni Kata ya Misunkumilo Manispaa ya Mpanda imewaomba wataalamu wa maji kuchunguza visima vya maji yanayotumika kwa shughuli mbalimbali.

Serikali ya mtaa wa Kampuni Kata ya Misunkumilo Manispaa ya Mpanda Mkoani Katavi imewaomba wataalamu wa maji Manispaa ya Mpanda kuchunguza maji ya visima yanayotumika kwa shughuli mbalimbali ikiwemo kunywa.

Wakizungumza na Mpanda Radio mwenyekiti wa mtaa wa Kampuni Bw.James Simoni  na mjumbe wa serikali ya mtaa huo Bi. Flora Simoni Mpenda viongozi na wakazi wa mtaa huo wamesema maji hayo yanaonekana na kuwa na kutu hali inayopelekea hofu kwa watumiaji wa maji hayo kuhofia kupata madhara kiafya.

Alisema mwenyekiti Simoni Mpenda ''Wananchi wa mtaa wa Kampuni kwa kweli wanalalamika juu ya maji ni machafu na yana rangi kama kutu au mawese lakini sasa tunapata mkanganyiko wataalamu wa maji wanatwambia yako salama lakini wanashindwa kunywa maji hayo''

Kwa sasa Mtaa wa kampuni wenye wakazi zaidi ya 1680 una mabomba matatu ya visima vilivyochimbwa tangu mwaka 2015 ambapo visima hivyo vilianza kupatwa na tatizo hilo baada ya kuchimbwa visima hivyo.

Kwa upande wao wakazi wa mtaa wa kampuni akiwemo Vitus Charles wameiomba serikali kuweka wazi taarifa ya usalama wa maji hayo ili kunusuru afya zao.

''Tunaomba tu viongozi kutoka serikalini waweze kulifuatilia maana mtaa huu upo nyuma kimaendeleo kwa kila kitu hata elimu miundombinu ya barabara maji''

Mamlaka husika katika sekta ya maji Manispaa ya Mpanda zimeahidi kuzungumzia suala hilo muda wowote baada ya kufika mtaa wa kampuni ili kuchukua sampuli ya maji hayo na kuyapima na hatimaye kutoa majibu ikiwa maji hayo yana madhara  kwa binadamu.

Tatizo la maji kusemekana kuwa na kutu limekuwa rikilipotiwa pia katika maeneo mengine ya Manispaa ikiwemo mitaa ya msasani na Tambukareli.

Habari na Issack Gerald wa mpanda radio.