HALAMSHAURI YA MANISPAA YA MPANDA YATARAJIA KUANZIA KUCHIMBA KISIMA CHA MAJI KATIKA MACHINJO

HALAMSHAURI ya Manispaa ya Mpanda imesema inatarajia kuanzia kuchimba kisima cha maji katika Machinjo yaliyopo Kata ya Mpanda Hotel kama hatua ya utatuzi wa changamoto ya uhaba wa maji mara kwa mara.

Hatua hiyo imethibitishwa na Mkurugenzi Mtendaji Manispaa ya Mpanda Bw.Michael Nzyungu wakati akizungumza na Mpanda Radio kufuatia Mamlaka ya Maji na usafi wa Mazingira Manispaa ya Mpansa (MUWASA) kusema kuwa haina maji ya kutosha.

Kwa upande wake Mkurugenzi wa mamlaka ya maji na usafi wa mazingira Manispaa ya Mpanda Mhandisi Zacharia Nyanda leo akizungumza na Mpanda Radio Ofisini kwake amesema tatizo la uhaba wa maji katika machinjio ya Mpanda Hotel inatokana na kiasi kidogo cha maji kilichopo katika vyanzo.

Baadhi ya wafanyakazi wanaofanya kazi katika machinjio ya Mpanda Hotel ambao hawakutaka kutaja majina yao kwa madai kuwa wao siyo wasemaji,wamesema siku ya jana walishindwa kuchinja ng’ombe kutokana na ukosefu wa maji ambapo wamesema tatizo hilo limekuwa likitokea takribani mara nne kwa mwezi ambapo imeelezwa kuwa tatizo hilo limekuwepo kwa muda mrefu.

Mwaka 2015 Mamlaka ya Chakula na dawa nchini TFDA ilifunga machinjio ya Mpanda Hotel kutokana na sababu mbalimbali ikiwemo uchafu uliotokana na tatizo la ukosefu wa maji kwa kuwa uwepo wa uchafu ulikuwa ukihatarisha afya za walaji.

Na.Issack Gerald