Wanaharakati wa kutetea haki za watu wenye ulemavu wilayani Mpanda wameiomba serikali kusimamia kanuni na sheria za nchi zinazotetea haki za watu wenye ulemavu.

MPANDA

Wanaharakati wa kutetea haki za watu wenye ulemavu wilayani Mpanda Mkoani Katavi,wameiomba serikali kusimamia kanuni na sheria za nchi zinazotetea haki za watu wenye ulemavu kama zilivyoainishwa katika katiba ya Jamuhuri ya muungano wa Tanzania.

Wanaharakati hao wakiwemo mtandao wa wazazi,Shivyawata, wajumbe wa baraza la watoto wilayani Mpanda na kamati ya kulea baraza la watoto,wametoa kauli hiyo leo katika kikao cha kujadili haki za watoto wenye ulemavu kikao ambacho kimefanyika mjini Mpanda.

Kwa upande wake mratibu wa mradi wa Elimu Jumuishio Mkoani Katavi Bw.Raphael  Fortunatus Jumbe pamoja na kueleza lengo la semina y aleo anabainisha makundi ambayo yameshirikishwa.

Kwa mjibu wa vifungu vya sheria ya katiba ya Jamhuri ya Muungano wa Tanzania mawaziri katika wizara husika wanatakiwa kusimamia misingi yote inayompa haki za msingi mtu mwenye ulemavu anapohitaji kuhudumiwa bila ubaguzi.

Kwa upande wake mwenyekiti wa shirikisho la vyama vya watu wenye ulemavu Mkoani Katavi SHIVYAWATA Bw.Issack Lucas Mlela ambaye pia ni mjumbe wa katamati ya kulea baraza la watoto wenye ulemavu pamoja na mambo mengine amesema sheria namba 9 ya mwaka 2010 inasimamia haki za watu wenye ulemavu huku akisema wakati mwingine unyanyapaa nao unaanzia kwa ndugu wenyewe kumnyanyapaa mwenye ulemavu suala ambalo halitakiwi likubalike.

Baadhi ya ibara zilizopo katika katiba ya Jamhuri ya Muungano ya mwaka 1977 ambazo zinatakiwa zisimamiwe vizuri ili watu wenye ulemavu wapate haki zao ni pamoja na ibara ya 4,20,26,27,28,31,32 na 34 ambavyo vinaitaka serikali ya Tanzania kutekeleza haki zote za msingi kwa watu wenye ulemavu katika Nyanja mbalimbali ikiwemo sekta ya afya,elimu,ajira na haki nyingine za kibinadamu.

Licha ya ibara hizo pia Tanzania ni miongoni mwa nchi za jumuiya ya madola ambazo zilisaini mikataba mbalimbali kwa ajili ya kusimamia na kutekeleza haki za watu wenye ulemavu.

Katika kipindi cha mwaka 2014 mpaka 2016 jumla ya watu wenye ulemavu 83 wakiwemo watoto wenye umri wa kwenda shule wametetewa na mradi wa elimu jumuishi wilayani Mpanda na kupatiwa haki zao muhimu kama elimu.

 source. Isack Gerald