MAKONDA AOMBA MICHANGO ZAIDI YA MIGUU YA BANDIA KWA WATU WENYE UHITAJI.

MKUU wa Mkoa wa Dar es Salaam, Paul Makonda amewataka wadau mbalimbali ikiwemo makampuni, na taasisi za watu binafsi kujitokeza na kujitoa kwa hali na mali ili kuchangia zoezi la utoaji wa miguu ya bandia kwa watu wenye uhitaji.

Makonda alisema hayo jana alipozungumza na waandishi wa habari jana. Alisema kuwa mipango aliyokuwa ameweka ni ya miguu 200, lakini uhitaji wa miguu hiyo bandia umeongezeka na kufikia idadi ya watu 650, ambao walijiandikisha kutoka sehemu mbalimbali ndani na nje ya mkoa wa Dar es Salaam.

Alisema, “Wapo waliokuwa mafundi rangi wazuri, madereva na wafanyabiashara, lakini kazi zao nyingi zimekwamishwa na tatizo walilolipata la kukosa mguu mmoja, ukimsaidia mtu kama huyo kupata mguu wa bandia itakuwa ni rahisi kwake kuendelea na kazi zake za kila siku na hata kuwaongezea uwezo wa kupata kipato kikubwa.”

Mkuu huyo alisema mbali na wale waliokuwa wamelengwa mwanzoni, haikuwa vyema kuwarudisha wale waliokuwa wametoka kutoka mikoa mingine wakiwa na uhitaji na tena tayari walishafanyiwa vipimo ili kubaini sehemu ya mguu ulipokatwa.

Alisema, “Kuna ambao walitoka nje na ndani ya Dar es Salaam waliofanyiwa vipimo kubaini kama kukatwa miguu yao inatokana na ajali au ni kwa sababu ya ugonjwa kama wa kisukari ili kuweza kubaini ni aina gani ya mguu utakaomfaa kwa sababu miguu ya bandia kwa wagonjwa wa kisukari ni tofauti. 

“Miguu iliyokuwepo ilionekana kuwa haitawafaa, hivyo italazimika watengenezewe miguu ambayo itakuwa laini na rafiki kwao, iliyopo ni ya wale waliokatwa miguu kutokana na ajali”.

Mpaka sasa, CCBRT walikuwa wamechangia miguu 25 wakati msanii wa muziki nchini, Mrisho Mpoto alishachangia miguu mitatu.

  Hata hivyo, Makonda alisema kuwa Taasisi ya Mifupa Muhimbili (MOI) imekubali kutengeneza miguu hiyo mingine, pamoja na Ajma Othopedics Medical Service ambao wameunga mkono zoezi hilo.