Muhingo Rweyemamu maziko yake yatafanyika Dar Jumanne, Septemba 5 .

Muhingo Rweyemamu enzi za uhai wake

 Muhingo Rweyemamu aliongoza halmashauri za Handeni, Makete na Morogoro akiwa mkuu wa wilaya.

Baada ya kikao cha mashauriano, imekubaliwa mwanahabari mkongwe na Mkuu wa Wilaya mstaafu, Muhingo Rweyemamu atazikwa katika makaburi ya Kinondoni, jijini Dar es Salaam.

Taarifa iliyotolewa na familia imesema maziko yatafanyika Jumanne, Septemba 5.

Kabla ya maziko imeelezwa kutakuwa na ibada ya kuaga mwili wa Muhingo katika Kanisa la Kiinjili la Kilutheri Tanzania (KKKT) Mbezi, Kibanda cha Mkaa.

Familia imesema mwili wa marehemu unatarajiwa kufikishwa nyumbani kwake Mbezi Luis kesho Septemba 4, ambako utalala.

Muhingo (67), alifariki dunia jana Septemba 2, katika Hospitali ya Aga Khan jijini hapa.

Kabla ya Rais Jakaya Kikwete wa Serikali ya Awamu ya Nne kumteua Muhingo kuwa mkuu wa wilaya, alikuwa akifanya kazi za uandishi wa habari.

Mtoto wa marehemu, Mwesigwa Muhingo amesema kifo cha baba yake kimetokana na maradhi yaMyelofibrosis yanayotokana na mifupa kushindwa kutengeneza damu.