TGNP kuwahamasisha wanawake kumiliki ardhi.

 Mtandao wa Jinsia Tanzania (TGNP) kwa kushirikaina na Wizara ya Ardhi, Nyumba na Maendeleo ya Makazi imeanza kuhamasisha wanawake wenye kipato cha chini kumiliki ardhi iliyopimwa ili wakopesheke na kuboresha biashara zao.

Mkurungenzi wa TGNP, Lilian Liundi alisema jana kuwa lengo ni kuwezesha wanawake wenye kipato kidogo kupata mikopo.

Pia, TGNP inazungumza na benki za biashara kuwapatia mikopo wanawake wenye viwanja vilivyopimwa, ili kukopeshwa kwa riba nafuu na kujikwamua na umaskini.

“Miaka iliyopita Tanzania imepiga hatua kwenye mambo ya usawa na jinsia, lakini changomoto ni upatikanaji na umiliki wa ardhi iliyopimwa kwa wanawake,” alisema Liundi.

Alisema ushiriki mdogo wa wanawake katika ngazi za uamuzi, unyanyasaji wa jinsia na kuwashirikisha kwenye mambo ya uchumi bado ni changamoto. Naye Ofisa Habari wa TGNP, Deogratius Temba alisema taasisi binafsi na umma zinatakiwa kushirikiana ili kuhakikisha wanawake wanashirikishwa kwenye uchumi kwa maendeleo ya Taifa.