Wawekezaji watakiwa kufuata masharti

Serikali ya Mapinduzi Zanzibar (SMZ) imesema sababu kuu inayochangia miradi mikubwa ya maendeleo kushindwa kutekelezeka inatokana na wawekezaji wenyewe kutofuata masharti yanayohitajika kwa mujibu wa sheria.

Waziri wa Nchi Afisi ya Rais na Mwenyekiti wa Baraza la Mapinduzi Zanzibar, Issa Haji Ussi ‘Gavu’ amsema Serikali ya Zanzibar imekuwa ikijitahidi kujitangaza ndani na nje ya nchi kwa lengo la kutangaza fursa zilizopo.

Gavu amesema kuwa juhudi zao hizo zimekuwa zikizaa matunda kwa kiasi fulani kwa wawekezaji mbalimbali  kujitokeza kwa lengo la kuanzisha miradi ya maendeleo ambayo itasaidia jamii ya Wazanzibar kutatua tatizo la ajira.

Gavu ametaja baadhi ya taratibu wanazokosea wawekezaji hao kwamba ni ukosefu wa fedha za kutosha katika uendeshaji wa mradi ,ukosefu wa watendaji imara katika mradi husika pamoja na  kutofuata taratibu za usajili.

 “Sisi kama Serikali tupo tayari kuona miradi mingi ya maendeleo inafanyika Zanzibar ila wao wenyewe wawekezaji wanaonekana ni wagumu kufuata taratibu zilizopo,” amesema Gavu.

Gavu amesema kuwa pamoja na matatizo hayo yote lakini Serikali itaendelea kutoa kila aina ya ushirikiano wake kwa kila mwekezaji ambaye atakuwa tayari kuja Zanzibar.

 “Mbali ya hali hiyo lakini pia tunaandaa mipango kabambe ambayo tunadhani inaweza kusaidia kuwavutia hawa wawekezaji ikiwamo wale wa kizalendo ili waone kuna umuhimu mkubwa wa kuwekeza Zanzibar bila ya kuwepo kwa mgongano wa masharti yaliopo” amesema Gavu.