Waziri Mkuu atoa mbinu kukabili uvamizi, uhalifu

Waziri mkuu kassimu Majaliwa 

Kibaha.

 Waziri Mkuu, Kassim Majaliwa amewataka wananchi kila mmoja kuwa mlinzi wa amani kwa kujilinda na kuwalinda jirani ili kukabiliana na matukio ya uvamizi na uhalifu ambayo yameanza kujitokeza maeneo mbalimbali nchini.

Majaliwa amesema kumeibuka matukio ya uvamizi, hivyo lazima kila mmoja ayatambue mambo yote hatarishi na awe mlinzi ili  kukabiliana nayo.

Kauli hiyo ameitoa tayari yakiwa yametokea matukio makubwa mawili ya kushambuliwa na kujeruhiwa kwa risasi Mbunge wa Singida Mashariki, Tundu Lissu ambaye anaendelea na matibabu jijini Nairobi, Kenya na Meja Jenerali mstaafu Vincent Mritaba.

Amesema hayo leo Jumanne alipozungumza na viongozi wa Serikali, vyama vya siasa ngazi ya wilaya na mkoa na wafanyakazi wa kiwanda cha  sabuni cha Keds kilichopo Kibaha, akiwa ziarani kutembelea viwanda mjini hapa.

"Ni hatari kama jambo hili la uvamizi litaendelea hadi kwa wawekezaji kwa sababu hatuna uhakika hawa wanaoendesha matukio haya nia yao ni nini kwa Taifa hili, hivyo kila mtu awe mlizi. Naomba mkoa muwalinde hawa wawekezaji," amesema.

Amesema Serikali imejipanga vyema kudhibiti hali hiyo, hivyo ameomba wananchi waiunge mkono katika kupambana na watu ambao wanaendelea kupoteza na kuathiri maisha ya wengine.

Hii ni mara ya nne ndani ya mwaka huu kwa  waziri mkuu kufanya ziara mkoani Pwani kukagua shughuli za uwekezaji wa viwanda.

@habari toka mwananchi