Shirikisho la Vyama vya Wafanyakazi Tanzania (Tucta) limeipongeza Serikali kwa uamuzi wa kulipa malimbikizo ya madai ya watumishi wa umma.

DAR ES SALAAM

Shirikisho la Vyama vya Wafanyakazi Tanzania (Tucta) limeipongeza Serikali kwa uamuzi wa kulipa malimbikizo ya madai ya watumishi wa umma wakiwamo walimu kwa kuwa itawaongezea ari ya kufanya kazi.

Katibu Mkuu wa Tucta, Dk Yahaya Msigwa amesema hatua hiyo itamaliza kilio cha muda mrefu cha wafanyakazi na kuongeza ari ya kazi.

Hatua hiyo inakuja baada ya serikali kusema malimbikizo ya madai ya watumishi wa umma 27,389 yenye thamani ya Sh43.39 bilioni yatalipwa pamoja na mshahara wa Februari, 2018 kwa mkupuo.

Hivi karibuni Tucta iliipelekea Serikali mapendekezo 11 yanayotakiwa kufanyiwa kazi kuboresha mazingira ya wafanyakazi nchini ikiwamo malipo ya malimbikizo ya madai yanayojumuisha madai ya watumishi ya zaidi ya miaka 10 iliyopita huku majina ya watakaolipwa ikielezwa yanaanza kutangazwa kwenye vyombo vya habari.

Chanzo:Mwananchi

#Changia Damu  Okoa Taifa