Bavicha mkoani Kilimanjaro limetangaza nia ya kufanya maandamano

KILIMANJARO
Baraza la  Vijana la Chadema(Bavicha), mkoani Kilimanjaro limetangaza nia ya kufanya maandamano ya amani yenye lengo la kuipongeza kambi rasmi ya upinzani bungeni.
Akizungumza  katika mahafali ya Umoja wa Wanachama wa Chadema Vyuo Vikuu (CHASO), Mkoa wa Kilimanjaro, Katibu Mwenezi wa Bavicha, Edward Simbeyi amesema kuwa watafanya maandamano mapema mwa mwezi huu ili kuipongeza kambi hiyo.

Amefafanua  kuwa wanakusudia kufanya hivyo kama chama cha CCM  kilivyofanya maandamano ya kumpongeza Rais Magufuli kwa kuzuia mchanga wa madini (Makinikia).
Ameeleza kuwa wabunge wa upinzani wamekuwa wakipambana kwa kujenga hoja  bungeni kuhakikisha wananchi wananufaika na rasilimali zao wenyewe badala ya watu wachache kunufaika nazo.

Hata hivyo, Kamanda wa Polisi Mkoa wa Kilimanjaro, Hamis Issah amesema kuwa maandamano yalishapigwa marufuku na  hayaruhusiwi kufanyika mahali popote pale.