Gabriel amesema Uturuki haitajiunga na Umoja wa Ulaya.

Waziri wa Mambo ya Kigeni wa Ujerumani Sigmar Gabriel 

Waziri wa Mambo ya Kigeni wa Ujerumani Sigmar Gabriel amesema Uturuki haitawahi kuwa mwanachama wa Umoja wa Ulaya kama itaendelea kuongozwa na Recep Tayyip Erdogan.

Katika mahojiano yaliyochapishwa kwenye gazeti la Bild, nchini Ujerumani, Gabriel amesema rais huyo wa Uturuki ameshindwa kuyapa umuhimu mazungumzo ya nchi hiyo kujiunga na Umoja wa Ulaya.

Matamshi yake huenda yakayadhoofisha hata zaidi mahusiano kati ya Ujerumani na Uturuki ambayo yamezorota kutokana na masuala kadhaa. Ujerumani ina wasiwasi kuwa mamlaka mapana aliyopewa Erdogan kupitia kura ya maoni mwezi Aprili yanaisogeza Uturuki mbali na misingi ya kidemokrasia.

Viongozi wa Umoja wa Ulaya wanakosoa msako wa Erdogan dhidi ya wapinzani kabla na baada ya jaribio lililoshindwa la mapinduzi dhidi yake Julai mwaka jana.

Erdogan anasema msako huo pamoja na mamlaka yake mapana vinahitajika ili kusaidia Uturuki kupambana na changamoto kubwa za kiusalama ndani na nje ya nchi.