‘Wanafunzi waliojeruhiwa kwa bomu wapo chini ya uangalizi’

KAGERA

Serikali ya Wilaya ya Ngara mkoani Kagera, imesema wanafunzi 11 ambao ni majeruhi wa bomu waliolazwa katika Hospitali ya Rulenge wataendelea kuwa chini ya uangalizi wa madaktari bingwa kutoka Hospitali ya Rufaa ya Bugando ya Mkoa wa Mwanza.

Mkuu wa Wilaya ya Ngara, Luteni Kanali Michael Mtenjele amesema hayo jana wakati akizungumza na waandishi wa habari ofisini kwake na kuongeza kuwa hali za majeruhi hao zinaonesha matumaini kiafya kutokana na juhudi za wataalamu za kuwapatia tiba.

Luteni Mtenjele amesema majeruhi watano baada ya kufanyiwa uchunguzi wameonekana kuwa na vipande vya bomu sehemu za mishipa na kwamba jitihada zinafanyika kuondoa vipande hivyo.

Aidha ameongza kuwa majeruhi wengine sita wanaendelea kuhudumiwa majeraha yao baada ya kufanyiwa upasuaji na hofu kubwa ilikuwa ni upungufu wa damu lakini wananchi wengi wamejitokeza kutoa damu.

Majeruhi 11 ni kati ya 42 ambao ni wanafunzi wa Shule ya Msingi Kihinga waliolipukiwa na bomu la kutupwa kwa mkono, Novemba 8.

Source: mwananchi