Mwenyekiti mpya wa Umoja wa Vijana wa CCM (UVCCM), Kheri James amewataka vijana nchini kufanya kazi kwa bidii na kutekeleza maagizo yote yaliyotolewa na Rais John Magufuli.

Kheri James

Mwenyekiti mpya wa Umoja wa Vijana wa CCM (UVCCM), Kheri James amewataka vijana nchini kufanya kazi kwa bidii na kutekeleza maagizo yote yaliyotolewa na Rais John Magufuli.

James ametumia sehemu kubwa ya hotuba yake aliyoitoa juzi mara baada ya kutangazwa kuwa mshindi kuwataka wanachama kuifanyia kazi hotuba ya mwenyekiti huyo wa CCM aliyoitoa wakati akifungua mkutano wa uchaguzi wa UVCCM.

Katika uchaguzi huo uliofanyika mjini Dodoma, James aliibuka mshindi kwa kupata kura 319 kati ya 583 zilizopigwa na kumwacha kwa mbali mpinzani wake, Thobias Mwesiga aliyepata kura 127.

James ametangazwa rasmi jana na msimamizi wa uchaguzi huo, William Lukuvi kuwa mshindi wa nafasi hiyo iliyokuwa ikiwaniwa na wagombea saba. Wakati akitangazwa, ulinzi ulikuwa umeimarishwa ndani ya ukumbi na mwenyekiti huyo mpya alikuwa na walinzi.

SOURCE: EATV