Waislam nchini Misri leo wamefanya sala katika msikiti ulioko kwenye rasi ya Sinai ulioshambuliwa wiki iliyopita.

Waislam nchini Misri leo wamefanya sala katika msikiti ulioko kwenye rasi ya Sinai ulioshambuliwa wiki iliyopita ambapo watu 305 waliuawa.

Televisheni ya serikali imeonesha waumini wakiwa ndani ya msikiti huo wa al-Rawdah kwenye eneo hilo la kaskazini nchini humo lililo katika hali tete katika kile kilichoelezwa na televisheni hiyo kuwa ilikuwa ni ishara ya kuonesha mshikamano na familia za wahanga wa shambulizi hilo pamoja na kupinga ugaidi.

Maombi hayo yameongozwa na Sheikh Ahmed al-Tayeb kiongozi wa mafundisho ya waislamu wa madhehebu ya kisuni.

Katika mawaidha yake wakati wa maombi hayo al-Tayeb amesema washambuliaji hao ni waovu wanaostahili kuuawa.

Hadi sasa hakuna kundi lililodai kuhusika na shambulizi hilo ambalo ni baya zaidi katika historia ya Misri.