Baraza la Mitihani la Tanzania (NECTA), limefuta matokeo ya watahiniwa 265 waliobainika kufanya udanganyifu katika mtihani wa kidato cha nne (CSEE) uliofanyika Oktoba, mwaka jana

DAR ES SALAAM

Baraza la Mitihani la Tanzania (NECTA), limefuta matokeo ya watahiniwa 265 waliobainika kufanya udanganyifu katika mtihani wa kidato cha nne (CSEE) uliofanyika Oktoba, mwaka jana.

Baraza hilo limebainisha aina za udanganyifu zilizofanywa na watahaniwa hao wakiwemo 136 wa kujitegemea na 129 wa shule kuwa ni pamoja na kuingia kwenye chumba cha mtihani na vitu visivyotakiwa, kufanyiwa mtihani na watu wengine, kubadilishana namba na karatasi za majibu na miandiko tofauti.

Hayo yamebainishwa  na Katibu Mtendaji wa Baraza la Mitihani la Tanzania (NECTA), Dk Charles Msonde, wakati akizungumza na vyombo vya habari Dar es Salaam kuhusu matokeo ya mtihani wa kidato cha nne kwa watahiniwa waliofanya mtihani huo mwaka jana.

Aina nyingine ya udanganyifu ni watahiniwa kuwa na mfanano wa majibu ya kukosa usio wa kawaida ambapo inasadikiwa walipatiwa majibu na mwalimu wao ambaye hata hivyo naye hakuwa analifahamu jibu.

Chanzo:Habari Leo

#Changia Damu Okoa Taifa