Aliyekuwa makamu wa rais wa Zimbabwe Emmerson Mnangagwa anatazamia kurejea nchini leo Jumatano mchana, siku moja baada ya rais Robert Mugabe kujiuzulu.

 

Aliyekuwa makamu wa rais wa Zimbabwe Emmerson Mnangagwa

HARARE  

Aliyekuwa makamu wa rais wa Zimbabwe Emmerson Mnangagwa ambaye amefutwa kazi wiki tatu zilizopita na kutoroka nchi hiyo kufuatia vitisho vya kifo , anatazamia kurejea nchini leo Jumatano mchana, siku moja baada ya rais Robert Mugabe kujiuzulu, na kuongoza Zimbabwe kwa muda kuelekea Uchaguzi Mkuu mwaka ujao.

Emmerson Mnangagwa anatazamia kuchukua hatamu ya uongozi wa nchi baada ya kuteuliwa katika mkutano wa hadhara wa chama cha Zanu-PF siku ya Jumapili kuongoza chama hicho tawala.

Kulingana na katiba ya nchi ya Zimbabwe rais anapojiuzulu makamu wake ndio anachukua nafasi yake hadi uchaguzi mpya.

Bw. Mnangagwa atatawazwa kesho Alhamisi na hivyo kuanza rasmi majukumu ya uongozi wa taifa la Zimbabwe, baada ya miaka 37 ya uongozi wa Robert Mugabe.

Maelfu ya raia wa Zimbabwe walimiminika katika mitaa ya miji mbalimbali baada ya tangazo la kujiuzulu kwa rais Robert Mugabe.

SOURCES:RFI SWAHILI.